Calçotada egin zuten larunbatean Buruntz-Azpin
Asteazkena, 2010-3-10

Buruntz-Azpi elkartean aurreko asteburuan egin zuten Calçotadan ehun lagun elkartu ziren, 70 heldu eta 30 haur. Calçot edo tipulinak eta arkumea jan zituzten brasan erreta hilaren 6an larunbatean egin zen bazkarian. Gironako Porqueres herritik etorritako Josep eta Maria katalunyako bikoteak ekarri zituen gero Buruntzazpi kanpoan erre zituzten Calçotak.
Lasarte-Oriara bigarren urtez jarraian etorri dira eta laster tradizio bihurtuko da, hurrengo urterako ere hitzordua jarri baitzuten. Oporretan ezagutu zuten lasarteoriatar batzuek bikotea eta hortik sortu zen festa egiteko aukera. 800 inguru calçot ekarri eta erre zituzten Basaundi auzoko elkartean, ondoren erretako azala kendu, saltsa batean busti eta eskuekin jateko. Bazkalostean giro bikaina izan zen, trikitixa eta txalaparta doinu eta umore onarekin bazkalostea asko luzatu zen. Aipagarria da haurrentzat haurtzaindegi zerbitzua ere izan zela Ttakuneko ludotekaren eskutik.