Garai berriak omen dira Euskal Herriarentzat. Konponbidea bidean omen zegoen. ETAren su-etenak barealdia omen zekarren berarekin… Garai berriak direnotan argazki zaharrak horitzen ari dira herriko tabernetako paretetan . Gogorra izan behar du zahartzen zoazen heinean kanpoko argazkiek barrote forma hartzen dutela sentitzeak. Parot doktrinaren izenean zaharrak berri. Autobus ugarik egin zuten urtarrilaren 7an Bilborako bidea baina ugari dira oraindik euren senide maiteak ikustearren astebururo-astebururo bidea egiten ari direnak. Ugari ospitalerako bidea ukatu zaien presoak; etxean mimatu eta zaindu beharko lirateken gaixo larriak. Barealdia zor zigutenean neure begiz ikusi nuen kantulagun bat nola zeramaten urrutira (Animo Ekaitz!). Oraindik ere ekaitza nagusi gurean. Eszeptizismoa hiltzen hasteko modu bat dela kantatzen du Anarik. Oztopoak oztopo, beraz, baikorrak izateko garaia da. Otegik aitortu zuen irribarre egitea hortzak erakusteko modu bat dela eta Pirritx eta Porrotxen arabera irribarre bakoitzak dakar garaipena. Ekaitzen hitzak gorde ditut bukaerarako, bi enkaputxatuk kotxera zeramaten bitartean burua itzuli eta amorruz oihukatu zuen: Lortuko dugu! Malkoak utzi eta irribarreak marrazten hasteko garaia da. Lortuko dugu.

Azkeneko zenbakia: 0997